ដោយ អ៊ឹង ប៊ុនថន
ថ្ងៃព្រហស្បតិ៍ ទី04 កក្កដា ឆ្នាំ2013 ម៉ោង10:17
សកម្មជនម្នាក់នៃគណបក្សសម្ព័ន្ធដើម្បីប្រជាធិបតេយ្យ
អះអាងថា ខ្លួនត្រូវបានរងការវាយដំរហូតដល់សន្លប់
ពីសំណាក់សកម្មជនរបស់គណបក្សប្រជាជនកម្ពុជា
កាលពីយប់ថ្ងៃទី៣ ខែកក្កដា ឆ្នាំ២០១៣នេះ។លោក កូវ គា សមាជិកគណៈកម្មាធិការកណ្តាល នៃគណបក្សសម្ព័ន្ធដើម្បីប្រជាធិបតេយ្យ ប្រាប់VODនៅព្រឹកថ្ងៃព្រហស្បតិ៍នេះថា ស្ត្រីរងគ្រោះ ជាសកម្មជនគណបក្សនេះ ឈ្មោះ ប៉ុល សុភី អាយុ២៥ឆ្នាំ ជាអ្នកលក់ដូគ្រឿងទេស នៅសង្កាត់ខ្មួញ ខណ្ឌសែនសុខ រាជធានីភ្នំពេញ។ លោកបន្តថា ជម្លោះហិង្សានេះ កើតឡើងខណៈបុរសឈ្មោះ ញ៉ាញ់ អះអាងជាសកម្មជនគណបក្សប្រជាជនកម្ពុជា បានមកទិញកាតទូរស័ព្ទពីជនរងគ្រោះ តែមិនព្រមប្រគល់ប្រាក់ថ្លៃកាតនោះទេ ហើយនៅពេលដែលស្ត្រីរងគ្រោះតាមទារ ជនល្មើសបានស្រែកសំឡុតថា ខ្លួនបានស្គាល់ច្បាស់ថាស្ត្រីរងគ្រោះជាសកម្មជនគណបក្ស”ជួង” រួចក៏ស្ទុះ មកវាយដំរហូតដល់សន្លប់ ៖ "ជាធម្មតាគឺយើងត្រូវយក លុយពីអ្នកទិញ ។ គាត់ថាទេ មែនត្រូវទាពីខ្ញុំទេ គាត់ទិញឲ្យគេ ដល់ពេលប្រកែកចុះឡើងៗបុរសហ្នឹងថា ហែងកុំខ្លាំងពេក អញស្គាល់ហើយអាគណបក្សជួងហ្នឹងនោះ អញមកពីគណបក្សប្រជាជន ហែងកុំចង់ខ្លាំងជាមួយអញនោះ គាត់និយាយអញ្ចឹងណាស់ ដល់ពេលទាស់សំដីគ្នាចុះឡើងៗ ក៏ស្ទុះទៅវាយអ្នកស្ម័គ្រចិត្ដរបស់យើងហ្នឹង គាត់ជានារី វាយឡើងសន្លប់" ។
លោក កូវ គា ឲ្យដឹងទៀតថា ក្រោយពីកើតហេតុសមត្ថកិច្ច បានចាប់ជនល្មើសយកទៅឃុំខ្លួនបណ្តោះអាសន្នភ្លាមៗ។ ប៉ុន្តែVOD មិនអាចសុំការបំភ្លឺបន្ថែមពីអធិការនគរបាលខណ្ឌ សែនសុខ បាននៅឡើយទេ។
នេះជាករណីទី១ ដែលទទួលបាន ចំពោះសកម្មជនគណបក្សនយោបាយ រងការវាយដំដោយហិង្សា ក្នុងអំឡុងពេលឃោសនាបោះឆ្នោត៕
ប្រភពពត៌មាន :សំលេងប្រជាធិបតេយ្យ VOD
